Ky është i arrestuari për fajde dhe bixhoz

Një rast i rëndë i dyshuar për fajde dhe organizim të bixhozit të paligjshëm është zbuluar dhe ndërprerë nga Policia e Kosovës në qytetin e Prizrenit, raporton Gazeta Sinjali.

Burimet e Sinjalit bëjnë me dije se Akcan Haskuk, rreth 37-vjeçar, është arrestuar mëngjesin e sotëm pas një operacioni të zhvilluar nga Sektori Rajonal i Hetimeve në Prizren në bashkëpunim me Drejtorinë për Hetimin e Krimit të Organizuar dhe Krimeve të Rënda, nën udhëheqjen e Prokurorisë Themelore në Prizren.

Sipas informacioneve, Haskuk dyshohet se gjatë vitit 2024 ka ushtruar veprimtari të paligjshme, përmes të cilës ka përfituar dobi pasurore përmes organizimit të bixhozit të paligjshëm dhe skemave piramidale, duke futur në borxh viktimën e identifikuar me inicialet S.M., rreth 31-vjeçar, të cilit më pas ia ka shndërruar borxhin në fajde.

Hetimet zbulojnë se i dyshuari ka ushtruar presion të vazhdueshëm ndaj viktimës, me qëllim të përfitimit të kamatës së paligjshme, duke e detyruar të veprojë në dëm të pasurisë së vet. Si rezultat i këtyre veprimeve, viktima ka pësuar dëme të konsiderueshme financiare.

Pas zbatimit të masave të fshehta të hetimit, Haskuk është kapur në flagrancë, me prova që rëndojnë pozicionin e tij në raport me drejtësinë.

Me urdhër të Prokurorisë, ndaj të dyshuarit është caktuar masa e ndalimit për 48 orë, ndërsa hetimet për ndriçimin e plotë të këtij rasti po vazhdojnë.

Sinjali do t’ju mbajë të informuar me çdo zhvillim të ri.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.