23-vjeçari sillet me patentë shofer të falsifikuar, kapet nga Policia

Një dukuri mjaft shqetësuese janë rastet e dallavereve me patentë shofer, që nuk janë të rralla në vendin tonë. Shumë shpesh është ngritur debati për mashtrimet dhe falsifikimet që bëhen kur lëshohet ky dokument, e madje ka pasur edhe aksione e arrestime.

Një rast i tillë është zbuluar të shtunën nga Policia, në një pikë kontrolli në Bresalc të Gjilanit, raporton Gazeta Sinjali.

Burimet nga Prokuroria kanë bërë me dije se një 23-vjeçar që u ndalua për kontroll, pas verifikimit të dokumenteve, rezultoi se dokumentin e patentë shoferit e ka të falsifikuar.

Për pasojë, i riu është arrestuar nga Policia dhe më pas është shoqëruar në stacion policor për intervistim, teksa patentë shoferi i është konfiskuar.

Ndaj tij, Prokurori i Shtetit ka urdhëruar inicimin e rastit për veprën penale “Falsifikim i dokumenteve” dhe dorëzimin e kallëzimit penal brenda afatit ligjor.