Përfshihet nga zjarri një shtëpi - dy persona kërkojnë ndihmë mjekësore

Një ngjarje e rëndë është shënuar të enjten në mesditë në qytetin e Malishevës, ku një shtëpi banimi është përfshirë nga flakët, duke shkaktuar panik dhe dëme të konsiderueshme materiale, raporton Gazeta Sinjali.

Sipas burimeve brenda Zjarrëfiksëve, incidenti ka ndodhur rreth orës 13:40 në rrugën “William Walker”. Në vendin e ngjarjes kanë dalë menjëherë njësitë policore, zjarrfikësit, një ekip i KEDS-it dhe personeli mjekësor nga QKMF-Malishevë.

Dy persona kanë kërkuar ndihmë mjekësore për shkak të inhalimit të tymit dhe gjendjes së shqetësuar që kanë përjetuar nga zjarri. Ndërkohë, ekipet e zjarrfikësve kanë arritur ta lokalizojnë zjarrin pas rreth 20 minutash përpjekjesh intensive.

Nga flakët janë shkaktuar dëme të mëdha materiale, por për fat të mirë nuk raportohet për të lënduar rëndë. Shkaktari i zjarrit ende nuk është zbuluar, ndërsa nuk ka të dyshuar konkret për momentin.

Prokurori i Shtetit është njoftuar dhe me urdhër të tij, rasti është cilësuar si “Zjarrvënie”, ndërsa hetimet janë duke vazhduar.