Dalin pamjet e të riut që u hodh në det në Shqipëri, për t’i ikur policisë

Një aksion i mirëorganizuar i Policisë së Sarandës në bashkëpunim me Policinë Kufitare ka çuar në finalizimin e një tjetër rasti të armëmbajtjes pa leje, përmes operacionit të koduar “Diving”, raporton Gazeta Sinjali.

Sipas Policisë së Shtetit, në rrugën “Butrinti”, në lagjen nr.1 të Sarandës, është ndaluar për kontroll një automjet luksoz tip “Porsche” me të cilin udhëtonin tre persona nga Kamza. Gjatë ndërhyrjes, njëri nga ta, shtetasi E. D., 27 vjeç, ka tentuar të largohet me shpejtësi duke u hedhur në det së bashku me një çantë ku ndodhej një armë zjarri pistoletë dhe municion luftarak.

Reagimi i shpejtë i Policisë dhe asistenca e Policisë Kufitare, e cila ndodhej pranë me mjet lundrues, bëri të mundur kapjen e tij në flagrancë, ndërsa çanta me armën u gjet brenda një kohe shumë të shkurtër.

Në përfundim të operacionit u arrestuan:

E. D., 27 vjeç, banues në Kamëz, për armëmbajtje pa leje dhe kundërshtim të punonjësit të policisë;

I. G., 21 vjeç, banues në Kamëz, për moskallëzim të krimit dhe veprime që pengojnë zbulimin e së vërtetës;

B. C., 27 vjeç, banues në Kamëz, për të njëjtat vepra penale si I. G., por që rezultoi edhe person i shpallur në kërkim për sigurim të kushteve dhe mjeteve për të kryer vrasje si dhe mbajtje pa leje dhe prodhim të armëve luftarake.

Gjatë operacionit, Policia ka sekuestruar armën e zjarrit, 16 fishekë dhe veturën luksoze tip “Porsche”, që shërbeu si mjet lëvizjeje për të dyshuarit.