Rrëzohet aeroplani në Britani, ishte nisur drejt Holandës

Një alarm emergjence u ngrit në Aeroportin e Southend në Essex të Mbretërisë së Bashkuar, pasi një aeroplan i vogël u rrëzua.

“Ne jemi në vendngjarje dhe po bashkëpunojmë me të gjitha shërbimet e emergjencës. Operacionet do të zgjasin disa orë. Do t’i kërkonim publikut të shmangë zonën ndërsa përpjekjet vazhdojnë”, thuhet në deklaratën e policisë.

Sipas Telegraph, bëhet fjalë për një aeroplan Beechcraft King Air B200 me dy motorë. Fluturimi ishte i destinuar për në qytetin Lelystad në Holandë.

Imazhet qarkulluan në mediat sociale duke treguar tym të zi të dendur që ngrihej mbi aeroport, ndërsa një dëshmitar okular u tha mediave lokale se pa një “top zjarri të madh”.

Rrethanat e aksidentit dhe numri i personave në bordin e avionit mbeten të panjohura, ndërsa hetimet janë në kulmin e tyre.