Detaje të reja: Tentim vrasja ndodhi pas një konflikti të mëhershëm, Policia: I dyshuari në arrati, ka shtënë disa herë

Gazeta Sinjali raportoi për një tentim vrasjeje sot në fshatin Mollopolc të Shtimes, si pasojë e një mosmarrëveshjeje të mëhershme mes dy personave.

Policia e Ferizajt ka njoftuar se rreth orës 12:00 ka pranuar një informatë për një rast plagosjeje me armë zjarri dhe ka reaguar menjëherë duke dërguar njësi policore dhe forenzike në vendin e ngjarjes.

Sipas komunikatës zyrtare të Policisë dhënë për Gazetën Sinjali, i dyshuari E.M. 32 vjeç dyshohet se ka shtënë disa herë me armë zjarri në drejtim të viktimës R.P., 38 vjeç, duke e plagosur atë.

Incidenti dyshohet të ketë ndodhur pas një konflikti të mëhershëm mes tyre.

“Bazuar në të dhënat e para, dyshohet se si pasojë e një mosmarrëveshjeje të mëparshme, i dyshuari ka shtënë disa herë në drejtim të viktimës”, – thuhet në njoftimin e Policisë së Ferizajt për Gazetën Sinjali.

Pas plagosjes, viktima ka arritur të largohet disa metra nga vendi i incidentit dhe ka kërkuar ndihmë në oborrin e një shtëpie të afërt. Aty është gjetur nga ekipi i emergjencës së Qendrës Kryesore të Mjekësisë Familjare (QKMF), i cili i ka dhënë ndihmën e parë mjekësore.

Ndërkohë, i dyshuari është larguar menjëherë nga vendi i ngjarjes në drejtim të panjohur dhe ndodhet në arrati. Policia ka kryer një bastisje në shtëpinë e tij me urdhër të prokurorit të shtetit, por ai nuk është gjetur aty.

“Me autorizim të prokurorit të shtetit, është kryer bastisje në shtëpinë e të dyshuarit, mirëpo ai nuk është hasur aty dhe aktualisht ndodhet në arrati”, thuhet më tej në njoftimin policor.

Gjatë ekzaminimit të vendit të ngjarjes, njësitë hetimore dhe forenzike kanë sekuestruar dy gëzhoja si prova materiale.

Rasti është cilësuar si “tentim vrasje”, dhe hetimet janë në vazhdim me qëllim identifikimin dhe arrestimin e personit të dyshuar.