Zvarritet ardhja e 30 autobusëve të rinj në Prishtinë, përplasen pozitë-opozitë

30 autobusët e rinj, prej të cilëve 6 pritet të jenë elektrikë, ende nuk kanë mbërritur. Dy partitë opozitare, Vetëvendosje dhe PDK, akuzojnë komunën për zvarritje. Nga ana e komunës bëjnë me dije se procesi i prokurimit po udhëhiqet nga BERZH-i, dhe se aktualisht janë në fazën e vlerësimit të ofertave. Ata nuk kanë dhënë një datë të saktë për mbërritjen e autobusëve, duke thënë se janë në pritje të një përgjigjeje lidhur me këtë çështje.

Në shkurt ishte njoftuar për publikimin e procedurës së prokurimit për blerjen e 30 autobusëve të rinj, e cila u tha se po realizohet përmes procedurës dhe platformës së BERZH-it, Bankës Evropiane për Rindërtim dhe Zhvillim.

Dy partitë më të mëdha opozitare VV dhe PDK po e kritikojnë Komunën e Prishtinës për zvarritje.

Ardhja e autobusëve të rinj është shumë e nevojshme për banorë të Prishtinës, për lagje të ndryshme, kanë mungesë lagjet Kodra e Trimave, Kolovica, Vneshta, Arbëria e shumë lagje në kryeqytet. Ne i bëjmë thirrje kryetarit Rama, që sa më parë të sjellë autobusë të rinj, por deri më tani ka dështuar në sjelljen e tyre”, tha Besart Krasniqi, asamblist i VV-së në Prishtinë

Granit Geci është asamblist i PDK-së në Prishtinë.

“Një nga premtimet e kryetarit Rama dhe qeverisjes së tij ka qenë edhe transformimi I transportit publik gjë që edhe ne si opozitë i kemi ofruar përkrahjen tonë të plotë. Çfarë ka ndodhur është krejtësisht e kundërta, mosardhja e autobusëve të rinj për t’i bashkangjitur flotës aktuale ka shkaktuar një dëm të madh sa i përket transportit publik” tha ai.

Nga komuna e Prishtinës u tha se tashmë janë në fazën e vlerësimit të ofertave. Duke mos dhënë datë se kur do të arrijnë këta autobusë, nga komuna thanë se për këtë janë në pritje të një përgjigjeje.

“Procesi i prokurimit udhëhiqet nga BERZH-i. Tash jemi në një fazë te re kur do të bëhet vlerësimi i ofertave, pastaj përzgjedhja edhe krejt në finale të vijnë autobusët e rinj dhe duke mos paragjykuar një proces që udhëhiqet nga kjo organizatë, qoftë për kohën dhe rëndësinë e procesit jemi në pritje të përgjigjes nga ana e tyre për aspektin kohor të ardhjes së autobusëve”, tha Donat Lushaku, zëdhënës i komunës së Prishtinës

Nga këta 30 autobusë, 6 prej tyre është thënë se do të jenë elektrikë./RTK