Ky është personi që qëlloi 5 herë me armë

Gazeta Sinjali sjell detaje ekskluzive nga tentim vrasja e rëndë që ndodhi më 13 korrik në fshatin Mollopolc të komunës së Shtimes, ku një person mbeti i plagosur nga arma e zjarrit.

Sipas burimeve të sigurta të Sinjalit brenda hetuesisë rajonale, i dyshuari Ekrem Mujota, rreth 32-vjeçar aktualisht në arrati, dyshohet se ka shtënë pesë herë me armë zjarri në drejtim të Rizah Pirajt, rreth 38-vjeçar i cili ka mbetur i plagosur në këmbën e djathtë, poshtë gjurit.

Ngjarja ka ndodhur rreth orës 11:40, në momentin kur viktima ishte duke udhëtuar me veturën e tij pikap të bardhë nga fshati Jezerc në drejtim të Shtimes. Me të hyrë në Mollopolc, ai është takuar me të dyshuarin Mujota, i cili ishte i ndalur me motoçikletë. Viktima ka ndalur automjetin për të biseduar me të lidhur me një mosmarrëveshje të mëhershme, kur papritur, sipas deklaratës së tij, Mujota ka nxjerrë armën dhe ka hapur zjarr në drejtim të tij.

Pasi është qëlluar, Rizah Piraj ka arritur të largohet dhe të futet në oborrin e një shtëpie aty pranë, ku ka hasur ekipin e emergjencës së QKMF-së, i cili i ka ofruar ndihmë të menjëhershme mjekësore.

Pas konsultës me Prokurorin për Krime të Rënda, është realizuar bastisje në shtëpinë e të dyshuarit, por ai nuk është gjetur në banesë dhe aktualisht rezulton në arrati. Hetimet janë në vijim dhe Policia është në kërkim aktiv të tij.