Murseli e shikoi trupin e Liridonës nga dera e morgut: “Kam probleme me zemër”
Leonard Ademaj, vëllai i Liridona Ademajt, po vazhdon dëshminë e tij sot para trupit gjykues.
Ai rrëfeu se pasi mori lajmin për vrasjen e motrës së tij Liridonës, kishte kërkuar dhëndrin e tij, Naimin, atë e kishte gjetur në hotel, siç pohoi kishte porositur edhe drekë në ato momente.
”Rreth orës 11 provova të kontaktoj me Naimin sepse nuk e dinim ku ndodhej. E thirra Valon Lluken, më tha: “Merre numrin e shoferit me të cilin është Naimi dhe fol me të.” E thirra Betim Podrimqakun, më tha që Naimi është në Swiss. U nisëm me djalin e axhës, dajën dhe tezakun. Na thanë se është lart në dhomë. Ai ishte i shtrirë në shtrat, kishte disa gjëra ushqimore në tavolinë që i kishte porositur si drekë. Nga habia menduam se ishte i frikësuar, se po e përjetonte me dhimbje”, dëshmoi Leonard Ademaj.
Ai tregoi edhe momentin kur kanë shkuar në morg për ta parë motrën e ndjerë, dhe se Naimi nuk ka pranuar me pa trupin nga afër.
“I thashë: “A mundemi me shku në morg me pa Liridonën?” Më tha: “Jo, nuk na lejohet.” E thirra vetë spitalin, i thashë: “A mundemi me ardh me pa trupin?” Shkuam, erdhi edhe Naimi. Mjeku tha: “Nëse keni ndonjë problem, mundeni me mos ardh.” Naimi tha: “Kam problem me zemër, s’e di a muj me e pa”. Ai erdhi deri te dera, dhe vetëm nga dera e shikoi. Nuk hyri brenda”, rrëfeu Leonardi.
