Mbyllen 22 qendra masazhi

Policia e Kosovës, përkatësisht Drejtoria për Hetimin e Trafikimit me Njerëz, ka realizuar me sukses planin operativ “Pranvera 2025” gjatë periudhës 2 qershor – 7 korrik 2025, në kuadër të aktiviteteve të përbashkëta ndërkombëtare të EMPACT, të organizuara nga JAD SEE. Në këto veprime morën pjesë shtete të ndryshme, përfshirë Kosovën, Gjermaninë, Finlandën, Brazilin, Kolumbinë, Tailandën, Greqinë, si dhe organizata si EUROPOL, INTERPOL, FRONTEX dhe EU4FAST.

Gjatë zbatimit të këtij plani janë ndërmarrë një sërë aktivitetesh në terren, përfshirë operacione për identifikimin e fëmijëve në situatë rruge, kontrolle në lokale nate dhe qendra masazhi, si dhe hetime lidhur me veprimtari të paligjshme si prostitucioni dhe trafikimi me njerëz.

Kontrolle dhe masa administrative

Gjatë operacioneve janë inspektuar:

• 47 lokale të muzikës live, ku janë hasur gjithsej 482 persona (352 femra dhe 130 meshkuj), prej të cilëve 204 shtetas të Kosovës dhe 278 të huaj (kryesisht nga Shqipëria). 8 lokale janë mbyllur për shkelje administrative.
• 67 qendra masazhi, ku janë identifikuar 149 persona (114 femra dhe 35 meshkuj), përfshirë 36 shtetas të huaj nga vende si Shqipëria, Tajlanda dhe Malawi. 22 prej këtyre qendrave janë mbyllur për shkelje administrative.

Arrestime dhe raste penale

Në kuadër të operacionit janë iniciuar disa raste penale:

• 10 raste për “keqtrajtim apo braktisje të fëmijës”, me 10 gra të arrestuara, prej tyre 5 kosovare dhe 5 të huaja (4 shqiptare, 1 nga Maqedonia e Veriut). Janë identifikuar 15 fëmijë lëmoshkërkues, si dhe 3 raste të tjera që janë referuar për kundërvajtje.
• 7 raste për “marrje me prostitucion”, ku janë arrestuar 14 persona, përfshirë 7 meshkuj kosovarë dhe 7 femra shtetase të huaja nga Kolumbia, Venezuela, Brazili dhe Turqia. Të gjithë të dyshuarit janë dënuar me gjoba dhe u është shqiptuar masa e dëbimit nga Kosova për tre vjet.

Hetime për trafikim dhe shfrytëzim

Policia ka iniciuar një rast për veprën penale “shfrytëzim i viktimave të trafikimit”, ku janë arrestuar 4 meshkuj kosovarë. Po ashtu, në një rast tjetër, pas zbatimit të masave të veçanta hetimore nga Prokuroria Themelore në Gjilan, është arrestuar një tjetër i dyshuar për “mundësim ose detyrim në prostitucion”. Viktima e këtij rasti, një femër kosovare, është strehuar në qendër për viktimat e dhunës.

Gjatë operacionit janë sekuestruar gjithashtu 7 dokumente të shtetasve të huaj për verifikim të mëtejshëm.

Policia e Kosovës ka bërë të ditur se të gjitha personat e hasur në lokale nate dhe qendra masazhi janë intervistuar me qëllim identifikimi të mundshëm si viktima të trafikimit, por asnjë rast nuk është konfirmuar deri më tani. Operacioni “Pranvera 2025” vlerësohet si hap i rëndësishëm drejt parandalimit dhe luftimit të trafikimit me njerëz dhe mbrojtjes së të drejtave të viktimave.