“Po më vdes vajza”, babai i 17 vjeçares që qëlloi veten në kokë

Një ngjarje e rëndë tronditi këtë të hënë opinionin publik në lagjen “Kushtrimi” në Vlorë, një vajzë 17-vjeçare mbeti e plagosur rëndë pasi tentoi t’i jepte fund jetës me armë zjarri duke u vetëqëlluar në kokë me armë.

Mjekët kanë konfirmuar se e reja ka dy dëmtime në kokë, një në pjesën e syrit afër temthit dhe një në pjesën sipër kokës. 17-vjeçarja është e intubuar, ndërsa qëndrimi i saj ende në jetë është për shkak se gjaku ka dalë jashtë kokës dhe nuk ka hemorragji. Vajza ndodhet në gjendje të rëndë pasi plumbi ka prekur afër syrit. Raportohet se adoleshentja ka rënë në koma.

E reja, e cila jetonte me gjyshërit pas divorcit të prindërve, dyshohet se ka vepruar në kushte të rënduara emocionale pas një konflikti me të atin.

Sipas burimeve, babai i saj, i cili jeton me bashkëshorten e re në një fshat pranë Vlorës, kishte kërkuar që vajza të transferohej për të jetuar me familjen e tij të re. Ky propozim mësohet të ketë shkaktuar kundërshtim nga ana e 17-vjeçares, e cila, nën presion të madh psikologjik, ka marrë një pistoletë dhe është vetëplagosur në banesë.

Pas ngjarjes, ajo u transportua fillimisht në spitalin rajonal të Vlorës, por për shkak të plagëve të rënda u nis me urgjencë drejt Spitalit të Traumës në Tiranë.