Mbyllet pishina e Gërmisë

Sportmarketing ka marrë vendim që të mbyllë përkohësisht Pishinën e Gërmisë, pikërisht në kulmin e sezonit veror. Vendimi vjen si masë për të kryer analiza shtesë të ujit dhe testim të pompave të filtrimit.

NPL Sportmarketing ka njoftuar se Pishina e Gërmisë do të qëndrojë e mbyllur deri ditën e shtunë, për shkak të kryerjes së analizave shtesë të ujit dhe testimit të sistemeve të filtrimit, në përputhje me udhëzimet teknike.

Ndërmarrja thekson se ky veprim bëhet për të siguruar standarde të larta higjienike dhe mbrojtjen e shëndetit të vizitorëve.

Gjithashtu, NPL Sportmarketing ka shprehur shqetësimin për presionin publik dhe dezinformatat që, sipas saj, po shpërndahen me qëllim dëmtimin e imazhit të saj, duke theksuar se janë të hapur për çdo kritikë apo sugjerim konstruktiv nga qytetarët.

“Ju sigurojmë se jemi të hapur ndaj kritikave dhe sygjerimeve tuaja, gjithmonë për të përmirësuar kushtet dhe shërbimin në të mirë të qytetarëve tanë! Ndërsa është për keqardhje presioni publik nga persona të caktuar dhe me agjendë, duke përdorur edhe media të caktuara për të dëmtuar imazhin e ndërmarrjes. Ky presion dhe këto dezinformata, po aq i dëmshme për ndërmarrjen tonë, janë poashtu në dëm edhe të qytetarëve dhe Kryeqytetit në përgjithësi!”