17-vjeçarja tentoi vetëvrasjen pas dhunës nga babai

Policia e Vlorës ka vazhduar hetimet për zbardhjen e rrethanave të ngjarjes së rëndë që ndodhi dje në lagjen “Kushtrimi”, ku një vajzë 17-vjeçare mbeti e plagosur rëndë pas një tentative për vetëvrasje me armë zjarri.

Sipas hetimeve paraprake, dyshohet se pas dhunës së ushtruar ndaj saj nga babai, vajza ka qenë në një gjendje të rënduar psikologjike, që ka çuar në veprimin e saj.

Si pasojë, babai i saj, S. S., u arrestua për veprat penale “Dhuna në familje” dhe “Shkaktimi i vetëvrasjes”. Po ashtu, gjyshi i vajzës, P. H., është proceduar në gjendje të lirë për “Mbajtjen pa leje dhe prodhimin e armëve”, pasi dyshohet se ai ka pasur armën e përdorur në incident.

Në vijim të hetimeve, policia po punon për gjetjen e armës së zjarrit, të cilën dyshohet se e kanë fshehur familjarët pas ngjarjes. Ndërkohë, shtetasja e mitur është dërguar në Spitalin e Traumës, ku ndodhet nën kujdesin e mjekëve. Materialet e hetimit janë dorëzuar në Prokurorinë e Vlorës për veprime të mëtejshme, ndërsa hetuesit vazhdojnë punën për zbardhjen e plotë të ngjarjes dhe rrethanave që çuan në këtë tragjedi familjare.

Njoftimi i Policisë Vlorë:

Vlorë/Vijojnë hetimet për zbardhjen dhe dokumentimin e ngjarjes së ndodhur dje, në lagjen “Kushtrimi”, ku u vetëplagos rëndë me armë zjarri një 17-vjeçare.

Vihet në pranga babai i 17-vjeçares dhe procedohet në gjendje të lirë gjyshi i saj.

Në vijim të veprimeve hetimore që po kryhen në drejtimin e Prokurorisë, për zbardhjen e rrethanave të ngjarjes së ndodhur mesditën e djeshme, në lagjen “Kushtrimi”, ku një shtetase 17 vjeçe mbeti e plagosur rëndë pas tentativës për vetëvrasje me armë zjarri, specialistët për Hetimin e Krimeve të Komisariatit të Policisë Vlorë:

• arrestuan në flagrancë, për veprat penale “Dhuna në familje” dhe “Shkaktimi i vetëvrasjes”, shtetasin S. S., 43 vjeç, banues në fshatin Romës, Vlorë, pasi dyshohet se, për shkak të dhunës së ushtruar ndaj vajzës së tij të mitur, ajo ka tentuar të vetëvritet, në gjendje të rënduar psikologjike, me armë zjarri të dyshuar pistoletë;

• referuan materialet në Prokurori ku nisi procedimi në gjendje të lirë për shtetasin P. H., 76 vjeç, gjyshi i të miturës, për veprën penale “Mbajtja pa leje dhe prodhimi i armëve, armëve shpërthyese dhe i municionit”, pasi dyshohet se posedonte në mënyrë të paligjshme armën e zjarrit me të cilën ka tentuar të vetëvritet mbesa e tij.

Vijon puna për gjetjen e armës së zjarrit, e cila dyshohet se është fshehur nga familjarët pas ngjarjes, si dhe kryerja e veprimeve të tjera hetimore, me qëllim dokumentimin e plotë të mekanizmit dhe rrethanave të kësaj ngjarjeje.

Shtetasja e mitur ndodhet në Spitalin e Traumës, nën kujdesin e mjekëve.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.