VV-ja pas vendimit të Speciales: Deputetët dhe qeveritarët që e votuan, të kërkojnë falje

Lëvizja Vetëvendosje ka reaguar pas vendimit të Gjykatës Speciale e cila rrëzoi mocionin e përbashkët të mbrojtjes në rastin Thaçi dhe të tjerët.

Në një postim në Facebook, kjo parti ka thënë se Gjykata Speciale po prodhon padrejtësi.

Ka shtuar se qeveritarët dhe deputetët që e miratuan e i votuan ata gjyqtarë të Gjykatës Kushtetuese që e konfirmuan këtë gjykatë në vitin 2015 bartin përgjegjësi të drejtpërdrejtë.

Vetëvendosje ka shkruar se vendimi i sotëm për rrëzimin e mocionit të mbrojtjes nga Gjykata Speciale është dëshmi e një logjike të përmbysur të drejtësisë, ku vija ndarëse midis çlirimit dhe agresionit zbehet qëllimshëm, ndërsa përpjekja e një populli për liri vihet nën dyshim me mjete juridike.

Sipas VV-së, ky model i drejtësisë selektive nuk bën drejtësi universale, por prodhon një narrativë të rreme, që e zhvendos fajësinë nga pushtuesi te i çliruari.

“Gjykata Speciale, e themeluar përtej çdo praktike të zakonshme ndërkombëtare, ka vepruar si instrument i imponuar mbi sovranitetin e Kosovës. Në vend që t’i shërbejë të drejtës, ajo i ka shërbyer paragjykimit. Madje duke hetuar dhe gjykuar padrejtësisht vetëm një palë, ajo ka përjashtuar sistematikisht dhunën shtetërore serbe që është burimi real i gjenocidit dhe krimeve të luftës e krimeve kundër njerëzimit të kryera në Kosovë”, thuhet tutje në reagim.

Sipas VV-së, më 29 prill dhe 15 maj 2023 Enver Dugolli si i mbijetuar i masakrës në Burgun e Dubravës i është drejtuar Prokurorit të Prokurorisë Speciale në Hagë me kërkesën për nisjen e hetimeve të krimeve të kryera gjatë planifikimit dhe ekzekutimit të masakrës së Burgut të Dubravës. Ndonëse Prokurori ka kthyer përgjigje se kërkesa do të shqyrtohet, VV-ja thotë se ende sot nuk ka asnjë veprim të njoftuar në këtë drejtim.

Ka shtuar se sot është sërish moment reflektimi.

“Ata qeveritarë e deputetë që e miratuan e votuan e ata gjyqtarë të Gjykatës Kushtetuese që e konfirmuan këtë gjykatë në vitin 2015 bartin përgjegjësi të drejtpërdrejtë. Ata duhet sot të kërkojnë falje, jo si akt formal, por si shenjë vetëdijeje për dëmin e madh institucional dhe moral që kjo gjykatë i ka shkaktuar vendit, kujtesës sonë kolektive dhe të ardhmes tonë. Ky do të ishte hapi i parë me të cilin duhet nisur një përbashkim për t’u mbrojtur jo vetëm juridikisht por edhe shoqërisht nga rreziku i shtrembërimit të thelbit të luftës sonë”, ka shtuar tutje VV-ja.

Lëvizja ka thënë se ka qenë dhe mbetet e qartë se e mbrojnë luftën çlirimtare si themel të shtetit dhe e kundërshtojnë çdo përpjekje për ta relativizuar të drejtën historike për çlirim. “Drejtësia nuk mund të jetë mjet për të rishkruar historinë, as për ta heshtur të vërtetën”, thuhet në njoftim.