“Ma mirë me më pas vra se çka më kanë bërë” – rrëfimi tronditës i të mbijetuarës së dhunës seksuale në Kosovë

Në ditën e tretë të transmetimeve të emisionit “Debat Plus”, të kushtuar grave të dhunuara gjatë luftës në Kosovë, një e mbijetuar ka treguar rrëfimin e saj tronditës mbi përjetimet e tmerrshme që ka kaluar.

Gruaja, e cila foli në kushte anonimiteti, ka rrëfyer se ishte dhunuar nga forcat serbe në një dhomë, ndërsa në dhomën ngjitur ndodhej motra e saj, që përjetonte të njëjtën dhunë.

“Më mirë me më pas vra atë ditë, se sa çka më kanë bërë. Ma mirë u kanë me më pas vra mua dhe motrën. Nuk isha kanë më, edhe sikur të gjithë që kanë vdekur, kisha vdekur edhe unë, s’e kisha përjetuar tërë jetën. Sot, kur ma qesin ‘stopin’, rrëqethem. Më frikëson edhe pas kaq viteve,” tha ajo me emocione të forta, duke shtuar falënderime për Policinë e Kosovës për trajtimin me respekt që ka marrë gjatë kontakteve me institucionet.

E mbijetuara tregoi se për vite të tëra nuk kishte pasur guximin t’ia tregonte askujt atë që kishte përjetuar – as burrit, i cili ndodhej në gurbet, e as fëmijëve.

Vetëm pas shumë vitesh, ajo kishte gjetur forcën për të hapur zemrën me një shoqe të ngushtë, e cila e kishte ndihmuar të lidhej me organizatën “Medika Gjakova”.

“Qëkur kam filluar me folë, më është çliruar pak zemra,” tha ajo, duke shtuar se edhe motra e saj, ndonëse e rënduar psikologjikisht, me kalimin e kohës kishte nisur të fliste, fillimisht vetëm me të.

“Frika nuk i hiqet, por është më e lirë se më parë,” përfundoi ajo mes lotëve.

Rrëfime të tilla theksojnë nevojën për drejtësi, përkrahje institucionale dhe kujdes të vazhdueshëm ndaj të mbijetuarve të dhunës seksuale gjatë luftës.