Ky është 36 vjeçari i arrestuar në kufi

Gazeta Sinjali mëson se një person i kërkuar për një rast të kanosjes së rëndë është arrestuar dje në pikën kufitare në Vermicë, në bazë të një urdhërarresti aktiv të lëshuar nga organet e drejtësisë në Kosovë.

Bëhet fjalë për Besjan Selimaj, rreth 36-vjeçar, shtetas i Anglisë dhe Shqipërisë, i cili dyshohet se më 20 gusht 2023, kishte kanosur seriozisht për jetë përmes aplikacionit WhatsApp viktimën D.B., rreth 36-vjeçar, i cili e kishte raportuar rastin në Stacionin Policor Veriu në Prishtinë.

Pas inicimit të hetimeve dhe lëshimit të urdhërarrestit, më 16 korrik 2025, i dyshuari është ndaluar në kufi gjatë hyrjes në Kosovë dhe menjëherë është arrestuar.

Ai është shoqëruar në Stacionin e Njësisë për Hetime në Prishtinë, ku është intervistuar në praninë e avokatit mbrojtës, ndërsa me aktvendim të Prokurorit të Shtetit, është dërguar në mbajtje për 48 orë në Stacionin Policor në Podujevë.

Hetimet për rastin janë në vazhdim.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.