Ekskluzive: E ndaloi në rrugë dhe e kërcënoi me armë – Arrestohet i dyshuari

Një incident ka ndodhur pasditen e 17 korrikut në rrugën “Lumni Surdulli” në Vushtrri, ku një person dyshohet se ka kërcënuar me armë një qytetar, për motive ende të paqarta.
Burimet e Gazetës Sinjali brenda Policisë bëjnë me dije se viktima, R. S. rreth 44-vjeçar, ka raportuar në Stacionin Policor se gjatë kohës sa ishte duke lëvizur me veturën e tij, një person tjetër me veturë e kishte ndalur në mënyrë të papritur, i kishte hapur dritaren dhe e kishte kërcënuar verbalisht, duke i drejtuar një armë zjarri.
Policia ka reaguar me shpejtësi dhe ka arritur ta ndalojë të dyshuarin, i cili u identifikua si H.S., rreth 55-vjeçar. Gjatë kontrollit në veturën e tij, në një sirtar është gjetur një armë zjarri e llojit Heckler – 9 mm, një karikator dhe 9 fishekë, të cilat janë sekuestruar si prova materiale.
Me urdhër të Prokurorit të Shtetit, është kryer edhe një kontroll në banesën e të dyshuarit, ku janë gjetur dhe sekuestruar edhe dy karikatorë dhe gjashtë fishekë të tjerë.
Personi i dyshuar është ndaluar për 48 orë dhe ndaj tij është iniciuar rasti “Kanosje” dhe “Mbajtje në pronësi, kontroll ose posedim të paautorizuar të armëve”.
Rasti është nën hetime.