Gjermania përgatitet për luftë

Gjermani

Në një zhvillim të pazakontë, autoritetet gjermane kanë hartuar një plan emergjence për spitalet në Berlin, për t’u përgatitur ndaj skenarëve të mundshëm lufte apo fatkeqësive të mëdha.

Sipas mediave lokale, plani është rezultat i një bashkëpunimi dyvjeçar mes Ministrisë së Shëndetësisë të Berlinit, ushtrisë gjermane dhe 12 spitaleve të kryeqytetit. Për arsye sigurie, dokumenti mbetet i klasifikuar.

Plani adreson situata kritike si: Sulmet ushtarake në zonën metropolitane, Kërcënimet hibride, Fatkeqësitë natyrore, Shembja e infrastrukturës kritike

Ndër pikat kyçe të planit janë sigurimi i funksionimit të spitaleve gjatë krizave, shpërndarja e pacientëve në mënyrë të koordinuar, ruajtja e rezervave mjekësore e energjisë, si dhe garantimi i shërbimeve në kushte ekstreme.

Ky vendim i Berlinit vjen në një kohë kur tensionet në Evropë janë në rritje, për shkak të luftës në Ukrainë dhe rrezikut potencial nga Rusia.

Sipas paralajmërimeve të fundit nga udhëheqësit ushtarakë dhe të inteligjencës gjermane, Rusia mund të sfidojë gatishmërinë mbrojtëse të NATO-s brenda katër viteve dhe të sulmojë një vend anëtar.

Ata thonë se Moska po shton ndjeshëm forcat dhe kapacitetet ushtarake konvencionale, dhe se deri në fund të dekadës, ushtria ruse mund të jetë e gatshme për një sulm të drejtpërdrejtë ndaj aleancës.