Aksident me fatalitet
Një aksident i rëndë trafiku ka ndodhur në rrugën Prishtinë-Gjilan, afër pendës së liqenit të Livoqit, ku si pasojë e përplasjes së dy veturave ka ndërruar jetë një pasagjere dhe janë lënduar katër persona të tjerë.
Sipas njoftimit të Policisë së Kosovës, në aksident janë përfshirë dy vetura me targa vendore.
Të gjithë të përfshirët kanë marrë ndihmë mjekësore fillimisht në Qendrën Emergjente në Gjilan, ndërsa dy prej tyre – drejtuesi i njërës veturë dhe një pasagjere – janë dërguar për trajtim të mëtejshëm në Qendrën Klinike Universitare të Kosovës (QKUK).
“Për shkak të lëndimeve të rënda drejtuesi i njërës veturë dhe pasagjerja femër kosovare janë dërguar në QKUK, ku si pasojë e plagëve të marra pasagjerja ka ndërruar jetë,” thuhet në njoftimin zyrtar të policisë.
Me urdhër të prokurorit të rastit, trupi i pajetë është dërguar në Institutin e Mjekësisë Ligjore për obduksion, ndërsa hetimet për zbardhjen e plotë të shkaqeve të aksidentit janë duke vazhduar./Gazeta Infokus
