LAJMI I FUNDIT: 40 vjeçari vdes pas aksidentit me traktor

Ka vdekur një 40-vjeçar në mëngjesin e sotëm në fshatin Bresanë të Dragashit, pas një aksidenti me traktor.

Lajmin e ka konfirmuar dhe zëdhënësi i policisë për rajonin e Prizrenit Shaqir Bytyqi.

Ai tha se viktima ishte duke punuar me traktor në zonën malore të fshatit Bresanë, në momentin e incidentit.

Teksa rrethanat e ngjarjes mbeten ende të paqarta, Bytyqi tha se personi i cili ishte i përfshirë në aksident ka ndërruar jetë në Spitalin rajonal të Prizrenit, si pasojë e plagëve të marra.

“Sot, më 18 korrik 2025, rreth orës 09:50, policia është njoftuar nga Qendra e Mjekësisë Familjare në Bresanë se një person mashkull, D.A. (40 vjeç), është sjell në qendër nga vëllai i tij me lëndime të rënda trupore.

Pas ofrimit të ndihmës së parë, ai është dërguar me autoambulancë në Spitalin rajonal të Prizrenit, ku më pas, për shkak të lëndimeve të marra, ka vdekur.

Sipas informatave fillestare, viktima ishte duke punuar me traktor në zonën malore të fshatit Bresanë në momentin e incidentit. Rrethanat e ngjarjes janë ende të paqarta. Policia ka reaguar menjëherë, ka dalë në vendin e ngjarjes, ka siguruar zonën dhe ka njoftuar njësitet përkatëse hetimore.

Në vendngjarje është angazhuar edhe prokurori kujdestar, me urdhër të të cilit rasti është iniciuar si “Vdekje e dyshimtë”, ndërsa trupi i pajetë është dërguar në Institutin e Mjekësisë Ligjore në Prishtinë”, ka thënë Bytyqi.