Ekskluzive: Policia kërkon ndihmën e qytetarëve për kapjen e këtij personi
Policia e Kosovës është në kërkim të një personi të dyshuar për sulm ndaj një të miture, ngjarje kjo që ndodhi më 25 prill 2025 rreth orës 09:00, në afërsi të qendrës tregtare “Interex” në Prizren.
Sipas njoftimit zyrtar, i dyshuari – një person i rritur, ende i paidentifikuar – dyshohet se ka ngacmuar dhe sulmuar të miturën me inicialet D.O. Rasti po trajtohet nga Sektori Rajonal i Hetimeve në Drejtorinë Rajonale të Policisë në Prizren.
“Për identifikimin e të dyshuarit, nga kamerat e sigurisë është siguruar fotografia e tij, mirëpo deri më tani nuk është arritur të bëhet identifikimi”, njofton Policia.
Me autorizim të Prokurorisë Themelore në Prizren, në përputhje me nenin 76, paragrafi 2 të Kodit të Procedurës Penale, është lejuar publikimi i fotografisë së të dyshuarit në media dhe rrjete sociale.
Policia kërkon bashkëpunimin e qytetarëve për ofrimin e informatave që mund të ndihmojnë në identifikimin dhe kapjen e tij.
“Të gjithë ata që kanë ndonjë informacion apo njohuri për vendndodhjen e personit të paraqitur në fotografi, luten të kontaktojnë Policinë e Kosovës përmes numrit 192, në rrjetet sociale, në faqen zyrtare të Facebook-ut të Policisë së Kosovës, apo në stacionin më të afërt policor”, thuhet në njoftim./Gazeta Infokus
