Vajzat dhe gratë po vazhdojnë të jenë viktimat më të shpeshta të dhunës në familje, ngacmimeve, sulmeve seksuale e dhunimeve, raporton Gazeta Sinjali.

Një rast i tillë i dhunimit është raportuar në Policinë e Gjilanit, ku një grua ka denoncuar se është detyruar të kryejë marrëdhënie seksuale pa pëlqimin e saj nga një person që, sipas saj, e kishte kanosur vazhdimisht.

Burime të Gazetës Sinjali brenda sistemit të drejtësisë bëjnë me dije se më 18 korrik 2025, rreth orës 13:40, një grua ka telefonuar Policinë nga një lokal në sheshin e qytetit të Gjilanit, duke raportuar se po kanosej nga një person i njohur për të.

Njësitet policore kanë reaguar menjëherë, duke shoqëruar të dyshuarin Flojrim Sacipi, rreth 38-vjeçar, nga fshati Lotovicë e Bujanocit dhe viktimën në Stacionin Policor të Gjilanit.

Gjatë intervistimit në prani të përfaqësuesve ligjorë, viktima ka deklaruar se, për shkak të presionit dhe kërcënimeve që kishte marrë nga i dyshuari, më 11 korrik 2025, ishte detyruar të takohej me të në një dhomë të motelit “Grande” në fshatin Livoq i Ulët, ku sipas saj, ai kishte kryer marrëdhënie seksuale pa pëlqimin e saj.

I dyshuari, në deklarimin e tij në prani të avokatit mbrojtës, e ka mohuar kategorikisht akuzën.

Lidhur me këtë ngjarje, është njoftuar Prokurori i Shtetit, i cili ka urdhëruar që të inicohet rasti “Dhunim” sipas nenit 227 të Kodit Penal të Republikës së Kosovës dhe ka marrë vendim që i dyshuari të ndalohet për 48 orë.

Hetimet janë në zhvillim dhe Policia po punon në mbledhjen e provave të tjera për zbardhjen e plotë të rastit.

Gazeta Sinjali do të sjellë informacione të reja sapo ato të konfirmohen zyrtarisht.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.