Ky është 31 vjeçari i arrestuar në Prishtinë

Gazeta Sinjali mëson se një aksion i zhvilluar në kuadër të Planit Operativ “Rrjeta” ka rezultuar me një arrestim të rëndësishëm në kryeqytet, ku është sekuestruar sasi e konsiderueshme e substancave narkotike.

Sipas burimeve të Sinjalit, mbrëmë, rreth orës 20:00, njësitë civile të Policisë kanë identifikuar një veturë të parkuar afër një lokacioni të dyshuar për shitblerje të narkotikëve në rrugën “Mustafë Kruja” në Prishtinë.

Një nga personat që ndodhej në veturë kishte hyrë në shtëpinë e dyshuar dhe pas daljes, është legjitimuar bashkë me personin përgjegjës për banesën – Valon Hasimi, rreth 31-vjeçar, i cili ka pranuar menjëherë se brenda në shtëpi posedon substanca të dyshuara narkotike.

Gjatë bastisjes në banesë, Policia ka sekuestruar: Dy qese me substancë të dyshuar marihuanë me peshë rreth 97.5 gram dhe 5.5 gram, katër telefona të mençur, dy mullinj për bluarje të narkotikëve.

Me urdhër të Prokurores së Departamentit për Krime të Rënda, ndaj të dyshuarit është caktuar masa e ndalimit për 48 orë.

Rasti është duke u hetuar si “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge.”

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.