Deputetët e Kuvendit të Kosovës deri tash janë paguar mbi 6 mijë euro për 49 seanca – çdo minutë u kushton qytetarëve thuajse 19 euro

Që nga momenti i dhënies së betimit më 19 prill, deputetët e Kuvendit të Kosovës kanë marrë pjesë në gjithsej 49 seanca parlamentare. Por ajo që bie në sy nuk është vetëm numri i seancave, por edhe shuma që ata kanë përfituar për këtë “angazhim”.

Sipas një përllogaritjeje të bazuar në të dhënat zyrtare, për 6 seanca, secili deputet ka përfituar rreth 750 euro bruto, që do të thotë 125 euro për një seancë.

Të dhënat janë bërë publike nga Eugen Cakolli i Institutit Demokratik të Kosovës (KDI), i cili ka përllogaritur se kjo do të thotë se çdo minutë efektive e një deputeti i kushton taksapaguesve 18.93 euro, ndërsa çdo sekondë, 0.32 euro, njofton Klankosova.tv.

Ndërsa kjo llogaritje ishte për 6 seanca dhe nëse kjo logjikë aplikohet për 49 seanca, atëherë çdo deputet është paguar 6,125 euro bruto – vetëm për pjesëmarrjen në seanca.

E gjithë kjo, ndërkohë që një pjesë e mirë e këtyre seancave kanë zgjatur vetëm pak minuta, e disa kanë dështuar të mbahen për shkak të mungesës së kuorumit.

Në përllogaritjen e kohës aktive të deputetëve rezulton se çdo minutë e punës së tyre i kushton qytetarëve rreth 18.93 euro, ndërsa çdo sekondë – 0.32 euro.

Kjo situatë ngre pyetje serioze për mënyrën se si menaxhohen fondet publike dhe efektivitetin e përfaqësuesve të qytetarëve në Kuvendin e Kosovës. Deputetët, të zgjedhur për të mbrojtur interesin e popullit, duket se janë shndërruar në një barrë të shtrenjtë për taksapaguesin kosovar. /PodujevaSot.net