Tërmet i fortë në Itali, banorët dalin në rrugë

Lëkundje të forta tërmeti u ndjen në Napoli rreth orës 9:15 të mëngjesit. Tërmeti u ndje në disa lagje të qytetit, kryesisht në zonën perëndimore pranë fushave Phlegraean, por edhe në qendër të qytetit. Lëkundjet me magnitudë 4.0 u regjistruan në një thellësi prej afërsisht 2.5 km.

Epiqendra e tërmetit ishte në zonën Bagnoli, ndërsa njerëzit dolën në rrugë të frikësuar. Një dëshmitar raportoi se “dyert dhe ballkonet filluan të përplaseshin dhe llambadarët filluan të lëkundeshin“.

Trafiku hekurudhor u pezullua menjëherë, për të lejuar kontrollet e nevojshme teknike në dy linjat që lidhin qendrën e Napolit me komunat Campi Flegrei, sipas EAV, kompanisë së transportit publik të Rajonit të Kampanias. Trenitalia njoftoi gjithashtu se “trenat me shpejtësi të lartë, ndërqytetas dhe rajonalë mund të kenë vonesa”.

Observatori i Vezuvit ka regjistruar rreth dhjetë tërmete në pak kohë, dy me magnitudë 1.5, me epiqendër në komunën e Pozzuoli-t.

Kujtojmë se më 30 qershor, u regjistrua një dridhje me magnitudë 4.6, më e forta e regjistruar ndonjëherë në zonë, në të njëjtin nivel me atë të 13 marsit.