EKSKLUZIVE: S’ka marrëveshje mes Kurtit dhe Limajt

Pak orë më parë ka përfunduar takimi ndërmjet kryeministrit në detyrë, Albin Kurti, dhe kreut të Nismës Socialdemokrate, Fatmir Limaj.

Takimi u mbajt në një moment kyç për vendin, në përpjekje për të dalë nga ngërçi politik që po zvarrit krijimin e institucioneve të reja pas zgjedhjeve.

Burime ekskluzive të “Mitropol” brenda këtij takimi bëjnë të ditur se Kurti ia bëri të qartë dhe në mënyrë të prerë Limajt se nuk mund të ketë marrëveshje mes tyre në rast se Limaj do insistoj në postin e kryeparlamentarit.

“Nuk do ketë marrëveshje në rast se Limaj nuk heq dorë nga kërkesa për kryeparlamentarin”, u tha ekskluzivisht për “Mitropol”.

Ndryshe, sot dështoi për herën e 49-të me radhë procesi i konstituimit të Kuvendit të Republikës së Kosovës.

Seanca e radhës do të mbahet më 21 korrik në orën 11:00.

Lidhur me çështjen e konstituimit të Kuvendit, Gjykata Kushtetuese ka obliguar deputetët që brenda 30 ditësh – deri më 26 korrik – të zgjedhin kreun e ri të Kuvendit dhe më pas të votojnë nënkryetarët, duke përmbyllur kështu konstituimin e organit ligjvënës.

LVV-ja, si parti fituese e zgjedhjeve, e ka të drejtën ekskluzive të propozimit të kryeparlamentarit, e ka propozuar Albulena Haxhiun për kryetare të organit ligjvënës. Megjithatë, Haxhiu është konsideruar si figurë përçarëse nga PDK-ja dhe AAK-ja që kanë kërkuar nga LVV-ja të ndryshojë propozimin, ndërkaq LDK-ja ka thënë se nuk do të votojë asnjë emër të partisë fituese për këtë post./Mitropol/