Skandali në koncertin e Coldplay, drejtori i Astronomer jep dorëheqje

Drejtori Ekzekutiv i kompanisë teknologjike Astronomer, Andy Byron, ka dhënë dorëheqjen pas publikimit të videos virale, ku shihet duke përqafuar drejtoreshën e Burimeve Njerëzore të kompanisë së tij.

Pamjet, të cilat u shpërndanë gjerësisht në rrjetet sociale, kanë shkaktuar polemika për shkak se Byron dhe Kristin Cabot, janë të dy të lidhur me partnerë të tjerë dhe kishin justifikuar udhëtimin si një “udhëtim pune”.

Si pasojë, kompania ka reaguar zyrtarisht të shtunën në mëngjes përmes një njoftimi për shtyp.

“Andy Byron ka paraqitur dorëheqjen e tij dhe Bordi i Drejtorëve e ka pranuar. Bordi do të fillojë kërkimin për drejtorin tonë të ardhshëm Ekzekutiv, ndërsa bashkëthemeluesi dhe drejtori i Produkteve Pete DeJoy vazhdon të shërbejë si drejtor i përkohshëm ekzekutiv”,– thuhet në njoftimin e Astronomer.

Kompania shton se mbetet e përkushtuar ndaj vlerave të saj dhe se udhëheqësit duhet të jenë model i sjelljes dhe llogaridhënies.

Ndërkohë, rasti ka hapur debat të gjerë online për etikën në vendin e punës, marrëdhëniet profesionale dhe përgjegjësinë e drejtuesve të kompanive të teknologjisë.