Plagosje me thikë në këtë qytet shqiptar

Një 25-vjeçar është arrestuar nga policia, pasi akuzohet se gjatë një konflikti për motive të dobëta, të ndodhur ditën e djeshme në Tropojë – Bajram Curri, ka plagosur me thikë një 18-vjeçar.

“Në vijim të veprimeve intensive hetimore të kryera në drejtimin e Prokurorisë së Kukësit, për dokumentimin e plotë të rrethanave të ngjarjes së ndodhur ditën e djeshme, në Bajram Curri, ku u plagos me mjet prerës gjatë një konflikti për motive të dobëta, shtetasi D. H., specialistët për Hetimin e Krimeve në Komisariatin e Policisë Tropojë arrestuan autorin e dyshuar shtetasin S. D., 25 vjeç, banues në fshatin Koçanaj, për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta’”, njofton policia.

Blutë e Tropojës sqarojnë se nga hetimet ka rezultuar se në orët e para të së shtunës, “shtetasi S. D., është konfliktuar për motive të dobëta me shtetasin D. H., 18 vjeç, banues në Bajram Curri dhe dyshohet se e ka goditur atë me mjet prerës thikë, e cila u sekuestrua në cilësinë e provës materiale”.

Sakaq, 18-vjeçari vijon të jetë në kujdesin e mjekëve, jashtë rrezikut për jetën. (A2 Televizion)