Avokati tregon si të ‘denoncohen’ deputetët-ministra

Avokati Ardian Bajraktari sqaroi se aktgjykimi i fundit i Gjykatës Supreme ka hapur rrugën që çdo akt ë nxjerrë Qeveria dhe ministrat nga koha e certifikimit të rezultatit të zgjedhjeve, përkatësisht betimit, “mund të konstatohen si të kundërligjshme, ndryshe derisa të mos konstatohet kjo, aktet janë të ligjshme.”

Bajraktari shtoi se pyetja që duhet adresuar është: “Si mund të bëhet kjo gjë?” Përgjigja, sipas tij, qëndron te legjitimiteti i palëve që mund të ngrejnë padi. Këto palë përfshijnë mbajtësit e interesave kolektive dhe ata që kanë interes publik, dhe nëse plotësojnë kushtet për të qenë palë në procedurën administrative, ata mund të kontestojnë aktet që cenojnë interesin kolektiv ose publik.

“Prej subjekteve të cilat kanë legjitimitet, rrjedhimisht, mund të inicojnë raste të tilla në gjykatë janë edhe mbajtësit e interesave kolektive apo interesave të tjera të publikut, nëse plotësojnë kushtet për të qenë palë në procedurën administrative, nëse pretendon cenimin e interesit kolektiv apo të publikut të gjerë.

Aktualisht, interes më legjitim për tu konstatuar ligjshmëria e vendimeve të Qeverisë nuk ka, duke ndjekur standardin tashmë të vendosur nga Gjykata Supreme, për të mos lejuar që një situatë atipike dhe jonormale të shndërrohet në normalitet.”

Ai gjithashtu ka theksuar se afati për ngritjen e padive është 60 ditë nga data e nxjerrjes së aktit, përveç rasteve të aktve normative nënligjore që mund të kontestohen gjatë gjithë periudhës në të cilën akti është në fuqi. Paditë për aktet e Qeverisë mund të dërgohen në Gjykatën Themelore në Prishtinë, ndërsa ato për aktet nënligjore në Gjykatën Supreme.

“Afati dhe ku të dërgohen paditë?

Afati në raste të tilla për padi është 60 ditë nga dita e nxjerrjes së aktit, kurse për aktet normative nënligjore, padia mund të inicijohet gjatë gjithë kohës sa akti është në fuqi.

Padia për vendime dërgohet në Gjykatën Themelore në Prishtinë, kurse padia për aktet nënligjore normative në Gjykatën Supreme.

Shoqëria civile edhe kësaj radhe e ka rastin dhe mundësinë të tregohet se është storje suksesi, se angazhohet për ligjshmëri e kushtetutshmëri e assesi për anarki e jonormalitet.”