Latifi: Shkaku i vdekjes së dy punëtorëve sot në Gjakovë është krejt i qartë

Profesori Blerim Latifi ka thënë se kushtet e punës janë shkaku i vdekjes së punëtorëve të ndërtimit, derisa ka komentuar vdekjen tragjike të dy punëtorëve në Gjakovë të hënën.

Latifi tha se industria e ndërtimit në Kosovë “është ndër më vdekjeprurëset”.

“Edhe dy punëtorë ndërtimi kanë humbur jetën sot. Industria e ndërtimit në Kosovë është ndër më vdekjeprurëset. Shkaku është krejt i qartë: kushtet e punës në këtë industri janë si ato të kapitalizmit të egër të shekullit XIX”, tha Latifi.

“Shto kësaj edhe faktin se pagat e këtyre punëtorëve janë kryesisht të mjerueshme”.

Latifi tha se vdekjet që ndodhin vazhdimisht përfundojnë “si lajme ditore, të paketuara me sentimentalizma në rrjetet sociale”.

Ai, kritikoi qeverinë të vetquajtur të majtë të Lëvizjes Vetëvendosje, për neglizhencë të plotë ndaj punëtorëve.

“Qeveria, që i thotë vetes e majtë, nuk bën asgjë më shumë përtej një proteste ditore që harrohet shpejt. Edhe partitë tjera po ashtu. Sindikatat janë praktikisht të vdekura. Ndërkohë, të ashtuquajturat ‘grupe me ide të majta’, në vend që të protestojnë për këta njerëz të shkretë që përditë plandosen të vdekur nga skelet e ndërtesave, merren me shkrime parullash për Palestinën, nëpër muret dhe rrugët e Kosovës”, tha Latifi.