Gjendet drogë në motel, arrestohet një person

Një rast i dyfishtë i posedimit të paautorizuar të armës dhe narkotikëve është zbuluar në orët e hershme të mëngjesit në fshatin Shkabaj të Obiliqit, ku një person është arrestuar pas bastisjes së një dhome moteli.

Burimet e Sinjalit brenda hetuesisë bëjnë me dije se më 22 korrik 2025, rreth orës 07:30, ne polici është raportuar një rast i dyshuar në Motel “Venecia” përgjatë magjistrales Mitrovicë – Prishtinë.

Sipas informacioneve, një person i shoqëruar nga një femër, që ndodhej në dhomë, dyshohej se mbante armë dhe drogë. Pas konsultimit me Prokurorin kujdestar, njësitë policore dhe hetuesit kanë ndërhyrë në dhomë, me lejen e të dyshuarit B.S., rreth 30-vjeçar.

Gjatë kontrollit janë gjetur 1.2 gram marihuanë dhe një armë e shkurtër “Zoraki” me një karikator, e cila dyshohet se është hedhur nga dritarja e dhomës për të shmangur konfiskimin. Armën Policia e ka gjetur në oborrin e motelit, afër dhomës ku qëndronte i dyshuari.

I dyshuari është shoqëruar në stacionin policor dhe intervistuar në prani të avokatit mbrojtës, por nuk e ka pranuar pronësinë e armës.

Në konsultim me Prokurorin e Shtetit, është urdhëruar që rasti të iniciohet për dy vepra penale: “Mbajtja në pronësi, kontroll ose posedim të paautorizuar të armëve”, “Posedimi i paautorizuar i narkotikëve, substancave psikotrope ose analoge”.

I dyshuari është dërguar në ndalim për 48 orë, me vendim të Prokurorisë Themelore në Prishtinë.

Hetimet janë duke vazhduar