Gjuajtje me armë mes vëllezërve për tokë

Mosmarrëveshjet për pronë shpeshherë përfundojnë me tensione të mëdha në mes të anëtarëve të familjes, e jo rrallëherë situatat degradojnë në incidente të rënda që rrezikojnë edhe jetën.

Një rast i tillë është shënuar në fshatin Koshtovë të Mitrovicës, ku një përplasje për tokë ndërmjet vëllezërve ka degraduar në përdorim të armës së zjarrit në fshatin Koshtovë, duke alarmuar Policinë dhe sjellë arrestimin e një personi.

Burime të Sinjalit bëjnë me dije se ngjarja ka ndodhur më 22 korrik 2025, rreth orës 10:30, në rrugën “Ilaz Dibrani” në Koshtovë, ku sipas raportimeve të dëshmitarëve, i dyshuari Xh.D., rreth 57-vjeçar ka pasur një përplasje me vëllezërit e tij lidhur me pronën e përbashkët familjare.

Fillimisht, i dyshuari kishte dëmtuar dhe larguar dyert e përbashkëta të sokakut, e më pas kishte shtënë me armë zjarri, në drejtim të panjohur.

Policia ka ndërhyrë menjëherë në vendin e ngjarjes, ku ka konfiskuar armën, ndërsa gëzhoja e shkrepur nuk është gjetur, pasi dyshohet se është larguar nga vendi i ngjarjes nga vetë i dyshuari.

Me vendim të Prokurorit kujdestar të Prokurorisë Themelore në Mitrovicë, pas intervistimit në prani të avokatit, i dyshuari është dërguar në mbajtje për 48 orë.

Rasti është inicuar për dy vepra penale:“Përdorimi i armës apo mjetit të rrezikshëm”, “Mbajtja në pronësi, kontroll ose posedim të paautorizuar të armës”