I riu që u ther me thikë mbrëmë u dërgua me urgjencë në QKUK

Gazeta Sinjali mëson për një rast të rëndë që ka ndodhur mbrëmjen e djeshme, më 22 korrik 2025, rreth orës 21:00, në rrugën “Nënë Tereza” në Fushë Kosovë, afër semaforëve pranë shkollës “Mihal Grameno”, ku një i ri është therur me thikë dhe ka pësuar lëndime serioze në pjesën e barkut.

Viktima është identifikuar si L.B., rreth 24-vjeçar, ndërsa i dyshuari është larguar nga vendi i ngjarjes dhe deri më tani nuk është arrestuar.

Sipas informacioneve të Sinjalit, dëshmitari i rastit ka ofruar ndihmë të menjëhershme duke e transportuar viktimën në QKMF në Fushë Kosovë, prej nga është dërguar më pas në QKUK në Prishtinë, nën sigurimin e Njësisë Policore Reaguese.

Ekipi mjekësor në QKUK ka ndërhyrë kirurgjikisht, ndërsa viktima është vendosur në repartin e kirurgjisë abdominale, ku po vazhdon trajtimin.

Pas konsultimit me Prokuroren e Departamentit për Krime të Rënda, është urdhëruar inicimi i rastit si “Vrasje në tentativë” dhe “Mbajtje në pronësi, kontroll ose posedim të paautorizuar të armëve”, si dhe vendosja e sigurimit policor për viktimën deri në urdhër të ri.

VIDEO: