Lumir Abdixhiku vendos fotografinë e Shaban Manajt në “Këndin e Kujtesës”

Sot në zyret e Lidhjes Demokratike të Kosovës, i pari i kësaj partie, Lumir Abdixhiku ka vendosur fotografinë e Shaban Manajt në “Këndin e Kujtesës”.

Më poshtë postimi i Abdixhikut:

Shaban Manaj në Panteonin e Kujtesës së LDK-së.

Sot, në selinë e Lidhjes Demokratike të Kosovës, në praninë e familjarëve, miqve dhe bashkëpunëtorëve të afërt, vendosëm fotografinë e Shaban Manajt në “Këndin e Kujtesës” – aty ku prehen figurat më të ndritura të historisë sonë politike.

Shabani qëndron në krah me Enverin, Xhemën, Ismetin e Nekibën, si shenjë e një kujtese historike.

Në 25-vjetorin e vrasjes së tij, përkujtimi për Shabanin mbetet i gjallë. Ai ishte avokat i shquar, veprimtar i palodhur dhe bashkëpunëtor i afërt i Presidentit Rugova. Me guxim, urtësi e përkushtim, Shaban Manaj la gjurmë të thella në rrugëtimin tonë për liri dhe ndërtim të shtetit.

Familjarët ende kërkojnë drejtësi. Shoqëria jonë ka detyrim të përhershëm – zbardhjen e këtij krimi dhe të gjitha vrasjeve politike pas luftës.

Zonjës Fatmushe, Fortesës, Shkodranit, Shkumbinit, Shpatit e Shkëmbit u themi të qëndrojnë të fortë edhe një çerek shekulli pas.

Lavdi jetës dhe veprës së Shaban Manajt!
Lavdi të gjithë veprimtarëve të lirisë!