Ismaili: Do ta hapim sheshin “Xhorxh Bush” deri në një zgjidhje moderne e të planifikuar

Kandidati për kryetar të Prishtinës, Uran Ismaili, ka dhënë zotimin e tij të parë elektoral: hapjen e sheshit “Xhorxh Bush” menjëherë pas marrjes së detyrës, duke e konsideruar mbylljen aktuale si një vendim të pa menduar dhe të dëmshëm për qytetin.

“Premtimi im i parë – Hapja e sheshit Xhorxh Bush do të jetë premtimi në javën e parë të qeverisjes time. Nuk jam kundër këmbësorëve, mirëpo jam kundër vendimeve të bëra pa plan, pa alternativë dhe pa vizion. Vendimet të cilat e kanë vështirësu jetën e qytetarëve të Prishtinës.” – tha Ismaili.

Ai kritikoi mënyrën si është menaxhuar çështja nga udhëheqja aktuale, duke thënë se mbyllja e këtij nyjeje kyçe të trafikut në qytet ka sjellë më shumë bllokada sesa zgjidhje.

“Mbyllja e sheshit, përveç që e ka mbyllë një nyje të rëndësishme të trafikut në Prishtinë, ka shfaqë edhe një mëndësi qeverisëse e cila e bën punën e fundit të parën. Ka qenë e lehtë me u mbyllë sheshi, por mbylljes nuk i ka paraprirë asnjë veprim i domosdoshëm që ka qenë i rekomanduar nga ekspertët qoftë ndërkombëtarë apo vendorë. Në ndërkohë që shumica e qytetarëve që përdorin vetura për të dërguar fëmijët në çerdhe për të shkuar në punë, dalin për të kryer dëtyrat e tyre të përditshme, kanë mbetur të bllokuar në trafikë për çdo ditë. Nuk mbahet sheshi i mbyllur për katër vjet dhe të mos punohet asgjë në të. Nuk bllokohet trafiku në Prishtinë e të mos aplikohet për lejet e nevojshme.” – shtoi ai.

Ismaili u zotua se do ta hapë përkohësisht qarkullimin në këtë zonë, derisa të krijohet një plan i plotë dhe profesional për transformimin e saj në një hapësirë moderne, ku do të parashihen edhe zgjidhje infrastrukturore si nënkalimet për vetura.

“Unë do të sigurohem që sheshi të jetë i hapur deri sa të jemi të gatshëm që mbylljen e tij mos ta bëjmë në kurriz të qytetarëve. Vetëm atëherë, punimet do të fillojnë për një shesh modern, me nënkalim për vetura dhe hapësirë për këmbësorë. Për mbarë dhe jo mbrapsht. Me plan dhe jo me improvizim.” – tha Ismaili.