Ky është burri i arrestuar që rrahu gruan pas dasmës

Gazeta Sinjali mëson ekskluzivisht për një rast të rëndë dhune në familje që ka ndodhur sot në mëngjes në Pejë, ku një burrë me shtetësi të dyfishtë është arrestuar pasi dyshohet se ka ushtruar dhunë ndaj bashkëshortes së tij.

Burimet e Sinjalit brenda Policisë bëjnë të ditur se më 24 korrik 2025, rreth orës 04:00, një patrullë policore është thirrur për një fjalosje në një banesë në Rrugën “Xhemajl Fetahaj”. Me të hyrë në banesë, zyrtarët kanë hasur në kaos të plotë, me mobilie të rrëzuara dhe viktimën me lëndime të dukshme në fytyrë.

Personi i dyshuar është Rahib NurMuhamed Ezadyar, rreth 35-vjeçar, me prejardhje afgane dhe shtetësi australiane, ndërsa viktima është E.M, shqiptare me po ashtu shtetësi australiane.

Sipas dëshmisë së viktimës, pas kthimit nga një dasmë, çifti kishte filluar një debat verbal që më pas u përshkallëzua në shtyrje fizike, ku ajo është rrëzuar dhe ka pësuar lëndime.

Viktima është dërguar fillimisht në Emergjencën e Spitalit të Përgjithshëm në Pejë, ku ka marrë trajtim mjekësor, dhe më pas është intervistuar nga Policia.

Ndërkohë, i dyshuari është arrestuar në vendngjarje dhe është shoqëruar në Stacionin Policor në Pejë, ku ndaj tij është iniciuar procedurë penale për “Dhunë në familje”, me urdhër të prokurorit kujdestar të shtetit.

Hetimet për zbardhjen e plotë të rastit janë duke vazhduar.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.