Ter Stegen me një mesazh për tifozët e Barçës

Portieri i Barcelonës, Marc-André ter Stegen, ka bërë të ditur përmes një mesazhi publik se do t’i nënshtrohet një ndërhyrjeje kirurgjikale në shpinë, duke theksuar se rikuperimi i plotë pritet të zgjasë rreth tre muaj.

“E mbaj me shumë krenari fanellën dhe ngjyrat e FC Barcelonës, si brenda ashtu edhe jashtë fushës, në momentet e suksesit dhe ato të vështira. Sot është një ditë e vështirë për mua personalisht,” ka shkruar Ter Stegen.

Ai ka treguar se pavarësisht formës së mirë fizike dhe atletike, dhimbjet e shpinës e detyruan të marrë këtë vendim pas konsultimeve me stafin mjekësor të klubit dhe ekspertë të jashtëm.

“Pas operacionit të fundit në shpinë u ktheva në fushë pas 66 ditësh, pothuajse dy muaj. Këtë herë, mjekët besojnë se do të duhen rreth tre muaj, për të qenë të kujdesshëm dhe për të shmangur çdo rrezik,” shtoi ai.

Portieri gjerman theksoi se e lëndon fakti që nuk mund t’i ndihmojë bashkëlojtarët në këtë periudhë, por u premtoi tifozëve se rikthimi i tij është vetëm çështje kohe.

“Do t’ju mbaj të informuar për rikuperimin tim dhe dua t’ju falënderoj të gjithëve, të dashur ‘culers’, që gjithmonë jeni pranë meje. Mos u shqetësoni, do të kthehem!” përfundoi mesazhin e tij Ter Stegen.