Franca do ta njohë Palestinën si shtet, njofton Macron

Presidenti francez Emmanuel Macron njoftoi të enjten se Franca do ta njohë Palestinën si shtet, në një kohë kur situata humanitare në Gazë është alarmante dhe po përballet me uri të madhe.

Ky vendim do të formalizohet në Asamblenë e Përgjithshme të Kombeve të Bashkuara në shtator, shkruan “Washington Post”.

Në një postim në rrjetin X, Macron theksoi: “Urgjenca sot është që lufta në Gazë të ndalet dhe popullsia civile të shpëtohet.”

Megjithë mbështetjen e tij për Izraelin dhe qëndrimet kundër antisemitizmit, presidenti francez shprehu zhgënjimin për mënyrën se si po zhvillohet lufta në Gazë nga ana e Izraeli.

“Duke pasur parasysh angazhimin historik të Francës për një paqe të drejtë dhe të qëndrueshme në Lindjen e Mesme, kam vendosur që Franca do ta njohë shtetin e Palestinës. Paqja është e mundur,” shkroi Macroni, duke publikuar edhe një letër drejtuar presidentit palestinez Mahmoud Abbas lidhur me këtë vendim.

Njoftimi u bë pak pasi Shtetet e Bashkuara ndërprenë bisedimet për armëpushim në Katar, duke akuzuar Hamasin për mungesë vullneti të mirë.

Presioni ndërkombëtar ndaj Izraelit ka marrë hov, ndërsa Franca dhe mbi 20 vende të tjera, kryesisht evropiane, dënuan kufizimet izraelite ndaj ndihmave humanitare dhe vrasjet e qindra palestinezëve që përpiqeshin të siguronin ushqim.