“A do t’iu merret mandati deputetëve nga Kushtetuesja?”

Ehat Miftaraj nga IKD-ja, në emisionin “Click” në RTV21, tha se Gjykata Kushtetuese nuk mund t’ua marrë mandatin deputetëve.

“T’u merret mandati deputetëve është e papranueshme, sepse kjo është jashtë vullnetit të qytetarëve. Gjykata Kushtetuese mund të ofrojë alternativa, nëse nuk ka sukses – të shpërndahet kuvendi – por jo t’u merret mandati deputetëve dhe të zëvendësohen me të rinj”, tha ai, duke shtuar se një gjë e tillë nuk ka logjikë.

Miftaraj tha se Gjykata Kushtetuese nuk mund t’ia japë të drejtën presidentes që ta shpërndajë kuvendin.

“Jo, në asnjë rrethanë Gjykata Kushtetuese nuk mund t’i japë kompetenca shtesë presidentes së Republikës, jashtë asaj që e ka përcaktuar Ligji për zgjedhjet… Nuk mund t’i japë prerogativa shtesë presidentes që të ketë rol në shpalljen e zgjedhjeve pa një vendim të gjykatës, sepse nëse i japim kompetenca të tilla presidentes, e cenojmë ndarjen e pushteteve”, tha ai.

Sipas tij, nëse do të kishte vullnet politik nga LVV-ja për të propozuar një kandidat të pranueshëm nga të gjithë, sot do të kishte kuvend të konstituuar.

Ai tha se efekti i kësaj mase është se nga data 27 korrik deri më 8 gusht kuvendi nuk mund të mblidhet.