Ky është i dyshuari për tentim vrasje në Prishtinë

Gazeta Sinjali ka siguruar ekskluzivisht identitetin e të dyshuarit për rastin e tentim vrasjes së rëndë që ndodhi mbrëmë në lagjen “Ulpiana” të Prishtinës.

Burime të sigurta brenda Prokurorisë bëjnë me dije se personi që dyshohet se ka shtënë 14 herë me armë zjarri në drejtim të viktimës është: Erion Hasani, 24 vjeçar.

Ngjarja ndodhi më 24 korrik 2025, rreth orës 23:00, pranë Hotel Ador, ku si pasojë e të shtënave me armë zjarri mbeti i plagosur B.H. rreth 36-vjeçar, i cili është transportuar me urgjencë në QKUK, ku po trajtohet për plagë të marra nga armë zjarri.

Në vendngjarje janë gjetur 14 gëzhoja dhe njolla gjaku, ndërsa pas disa orësh, i dyshuari është dorëzuar vetë në Policinë e Vushtrrisë.

Më 25 korrik, në prani të avokatit, Hasani është intervistuar nga hetuesit rajonalë dhe nga ai është sekuestruar një armë zjarri “Sig-Sauer”, me karikator dhe tre fishekë, që dyshohet të jetë përdorur në atentat.Me urdhër të Prokurorit për Krime të Rënda, i dyshuari është dërguar në ndalim për 48 orë. Hetimet vazhdojnë.

Shënim: Personat e apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.