Një person vdes në vendin e punës pasi bie nga lartësia
Një tjetër rast tragjik është shënuar në vendin e punës, ku një 27-vjeçar ka humbur jetën pasi ka rënë nga lartësia në një objekt ndërtimor në oborrin e Motel XXL, përgjatë magjistrales Ferizaj – Prishtinë, raporton Gazeta Sinjali.
Sipas burimeve të sigurta brenda hetuesisë, më 26 korrik 2025 rreth orës 11:45, njësitë hetimore rajonale në Ferizaj janë njoftuar se një person pa shenja jete ndodhej në Qendrën Emergjente në Prishtinë.
Hetuesit kanë konfirmuar se bëhet fjalë për Triumf Islamin rreth 27-vjeçar, i cili ka ndërruar jetë si pasojë e plagëve të rënda të shkaktuara nga rënia nga lartësia. Sipas mjekut kujdestar, ai kishte marrë politrauma të shumta në trup dhe nuk kishte mundur t’i mbijetojë.
Rasti dyshohet të jetë rezultat i shkeljeve të rënda të sigurisë në punë, ku mungesa ose dëmtimi i pajisjeve mbrojtëse dyshohet se ka qenë faktor kyç në tragjedinë e ndodhur.
Prokurori kujdestar për krime të rënda në Ferizaj, është informuar për rastin dhe ka marrë vendim që, për shkak të kërkesës së familjes, mos të kryhet autopsia, duke urdhëruar që trupi i viktimës të lirohet për ceremoninë mortore.
Rasti është iniciuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, ndërsa hetimet janë në vijim për të përcaktuar përgjegjësinë ligjore të të përfshirëve.
