Një tjetër grua e dhunuar nga burri, i dyshuari e goditi edhe fëmijën

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe fëmijët që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Së fundmi, një rast i tillë është regjistruar më 31 korrik 2025 në rrugën “Ali Zeneli” në Mitrovicë, ku një burrë ka ushtruar dhunë ndaj bashkëshortes dhe fëmijës së tij të mitur.

Burime të Sinjalit mësojnë se E.M., rreth 35-vjeçare ka raportuar se pas një mosmarrëveshjeje me bashkëshortin F.M., rreth 39-vjeçar, ky i fundit ka ushtruar dhunë ndaj djalit të tyre, ndërsa më pas ka sulmuar fizikisht edhe atë.

Pas raportimit, patrulla policore ka intervenuar dhe ka arrestuar të dyshuarin. Viktima ka refuzuar trajtimin mjekësor, por për shkak të situatës së krijuar, është dërguar për strehim tek familjarët në Gjilan.

Me autorizim të prokurorit kujdestar, rasti është iniciuar si “Dhuna në familje”, ndërsa i dyshuari është liruar në procedurë të rregullt, përkundër faktit se dhuna është ushtruar edhe ndaj fëmijës.

Rasti mbetet nën hetim.