LAJMI I FUNDIT: 16 vjeçari kosovar vdes në Zvicër

Një aksident tragjik ka tronditur kantonin e Aargaut në Zvicër, ku dy adoleshentë kanë humbur jetën pas një përplasjeje të rëndë.

Ngjarja ndodhi të premten në mëngjes në Wohlen, në një zonë ku shpejtësia maksimale e lejuar është 30 km/h.

Sipas Bernhard Graser, zëdhënës i Policisë Kantonale të Aargaut, një djalë 16-vjeçar po drejtonte një makinë tip Mercedes-Benz, me të cilin udhëtonin edhe dy shokët e tij. Për shkaqe ende të paqarta, drejtuesi i mjetit humbi kontrollin, duke dalë nga rruga. Automjeti kaloi nëpër një kopsht, u përplas me një pemë dhe përfundoi duke u përplasur me murin e një shtëpie.

Banorët e zonës dëgjuan zhurmën e madhe dhe dolën menjëherë në ndihmë të të rinjve, por pamja ishte shokuese. Forcat e rendit dhe ekipet mjekësore mbërritën menjëherë në vendin e ngjarjes, por për dy prej adoleshentëve ishte tepër vonë. Pavarësisht përpjekjeve për ringjallje, një 16-vjeçar dhe një 19-vjeçar humbën jetën në vendngjarje. Ndërsa, adoleshenti i tretë, 19 vjeç, i cili ndodhej në sediljen e pasme, pësoi lëndime të rënda dhe u transportua menjëherë në spital.

Policia ka nisur një hetim të detajuar për të zbardhur shkaqet e aksidentit. Graser theksoi se aksidenti flet shumë për shpejtësinë e lartë me të cilën po lëviznin adoleshentët, duke tejkaluar ndjeshëm kufirin e lejuar.

Detaje të tjera rreth identitetit të viktimave bëjnë me dije se 16-vjeçari që drejtonte makinën ishte me origjinë nga Kosova, ndërsa pasagjeri i tij 19-vjeçar ishte zviceran. Të dy banonin në të njëjtin rajon. Adoleshenti i plagosur rëndë është banor i Cyrihut.

Për momentin, mbetet e paqartë se pse një 16-vjeçar, pa patentë, ishte në timon. Hetimet janë duke vazhduar për të sqaruar të gjitha rrethanat e kësaj tragjedie.