Prishtinë: Gjendet një minë antipersonel, ndërhyn njësia speciale

Një ngjarje e rëndë dhe potencialisht fatale është parandaluar dje në lagjen Sofalia të Prishtinës, ku një mjet shpërthyes i dyshuar si minë antipersonel është zbuluar në rrugën “Kika”, mëson ekskluzivisht Gazeta Sinjali.

Burime të sigurta brenda Prokurorisë bëjnë me dije në pasditën e djeshme, rreth orës 13:30, Policia është njoftuar për praninë e një mjeti të dyshuar shpërthyes. Njësitë reaguese të Policisë kanë siguruar menjëherë perimetrin, ndërkohë që janë angazhuar edhe njësitë e hetimeve dhe forenzikës, të cilat kanë arritur në vendin e ngjarjes rreth orës 15:30.

Pas vlerësimit të situatës, është njoftuar Forca e Sigurisë së Kosovës (FSK) si dhe Njësia për Trajtimin e Mjeteve Eksplozive (NJTME) në kuadër të Policisë së Kosovës.

Rreth orës 19:05, pjesëtarët e NJTME-së kanë konfirmuar se mjeti i raportuar ishte një minë antipersonel, e cila dyshohet të jetë e mbetur nga ndonjë periudhë lufte. Mina është tërhequr nga vendi i ngjarjes dhe është transportuar për trajtim të mëtejmë nga ekipet e specializuara.

Ndërkohë, Policia ka qëndruar në vendngjarje për të siguruar perimetrin derisa FSK të kryejë një kontroll më të gjerë të zonës, për të përjashtuar praninë e ndonjë mjeti tjetër të rrezikshëm.

Rasti është cilësuar si “Shkaktim i rrezikut të përgjithshëm” dhe me urdhër të Prokurorit Kujdestar, hetimet do të vazhdojnë në koordinim të plotë me autoritetet përkatëse.

Gazeta Sinjali do të vijojë raportimin me detaje të reja për këtë rast të ndjeshëm.