Ky është personi që dyshohet se dhunoi gruan me të meta mendore

Një rast tronditës dhunimi ka dalë në dritë pas një denoncimi të bërë nga një institucion shëndetësor në Prishtinë, i cili zbuloi se një grua me aftësi të kufizuara mendore ishte paraqitur për abort mjekësor, pasi kishte mbetur shtatzënë.

Burime të sigurta të Sinjalit bëjnë me dije se pas hetimeve të zhvilluara nga Njësia e Hetimeve të Përgjithshme në Gjilan, me autorizim të Prokurorisë Themelore, është identifikuar dhe arrestuar i dyshuari për këtë vepër të rëndë penale.

I arrestuari është Nazmi Salihu rreth 33-vjeçar, banor i fshatit Sllatinë e Epërme, Viti, i cili dyshohet se ka kryer marrëdhënie seksuale me një grua të lindur më 1993, e cila, për shkak të gjendjes së saj mendore, konsiderohet person posaçërisht i ndjeshëm sipas ligjit penal.

I njëjti është arrestuar më 1 gusht 2025 dhe është shoqëruar në lokalet e NJHP-së, ku është intervistuar në prani të avokatit mbrojtës. Me vendim të Prokurorit të Shtetit, Nazmi Salihus është ndaluar për 48 orë, ndërsa rasti është iniciuar si “Dhunim” në rrethana të rënda.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.