18-vjeçari shqiptar qëllon me armë banesën e fqinjit, arrestohet nga policia

Policia e Krujës ka vënë në pranga një 18-vjeçar, i cili dyshohet se ka qëlluar me armë zjarri në drejtim të banesës së komshiut të tij, pas një konflikti për motive të dobëta.

Pas marrjes së një telefonate denoncuese, ku një shtetas njoftonte se banesa e tij ishte qëlluar me armë zjarri, efektivët e policisë shkuan në vendngjarje.

Si rezultat i veprimeve hetimore dhe operacionale, u arrestua në flagrancë shtetasi Q. M., 18 vjeç, banues në fshatin Mazhe e Madhe, i cili rezulton person me precedentë të mëparshëm penalë.

Sipas Policisë, i riu kishte pasur konflikte të vazhdueshme me komshiun, dhe pas debatit të fundit ka qëlluar me armë zjarri tip pushkë në drejtim të banesës së tij.

Gjatë kontrollit në zonë, Policia gjeti dhe sekuestroi në cilësinë e provës materiale armën e përdorur, së bashku me municion luftarak.

Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Krujë, për vijimin e veprimeve ligjore.