Mërgimtarja 15 vjeçare largohet me persona të panjohur

Një rast alarmues është raportuar mbrëmë në Lipjan, ku një vajzë 15-vjeçare me nënshtetësi gjermane është larguar nga shtëpia dhe dyshohet se është futur në një veturë me targa të Gjermanisë, në shoqërinë e personave të panjohur.

Burime të Sinjalit mësojnë se më 03 gusht 2025, rreth orës 21:30, në Stacionin Policor në Lipjan është paraqitur Xh. S. rreth 42-vjeçar, e cila ka raportuar zhdukjen e vajzës së saj, E.S. rreth 15-vjeçare.

Sipas deklarimit të saj, e mitura është larguar pa pëlqimin e prindërve, duke hipur në një veturë të dyshimtë, drejtuesit dhe pasagjerët e së cilës mbeten ende të paidentifikuar. Vajza ishte e veshur me maicë të bardhë dhe minifund të shkurtër të bardhë.

Me urdhër të Prokurores Kujdestare për të Mitur, rasti është iniciuar si “Person i zhdukur” dhe hetimet janë duke vazhduar për lokalizimin e vajzës dhe identifikimin e personave të përfshirë.

Rasti ka ngritur shqetësim të madh te familjarët, ndërsa Policia po kërkon ndihmën e qytetarëve që mund të kenë parë diçka apo të kenë informacion të vlefshëm.