Adelina Ismaili përfiton 20 mijë euro nga Ministria e Kulturës

Këngëtarja Adelina Ismaili është përkrahur me 20 mijë euro nga fondet e taksapaguesve kosovarë, disa muaj pasi u pozicionua publikisht në përkrahje të Lëvizjes Vetëvendosje në fushatën e zgjedhjeve nacionale të 9 shkurtit.

Gjashtë muaj pasi shprehu haptasi mbështetjen e saj për Lëvizjen Vetëvendosje, Adelina Ismaili është “kompensuar” financiarisht nga pushteti qeverisës i Lëvizjes Vetëvendosje.

Ministria e Kulturës, Rinisë dhe Sporteve (MKRS), e udhëhequr nga Hajrulla Çeku, e ka përkrahur këngëtaren me një grant në vlerë 20 mijë euro.

Granti, i destinuar për projekt-propozime të individëve në fushën e artit, është aprovuar më 1 gusht të këtij viti, raporton Paparaci.

Bazuar në listën preliminare të fituesve, rezulton se këngëtarja prishtinase është në mesin e rreth 200 individëve të mbështetur financiarisht. Shuma e grantit të saj, 20 mijë euro, është më e madhe sesa e secilit prej individëve të tjerë fitues në këtë thirrje.

Ismaili është përkrahur financiarisht për mini-albumin e fundit të saj. “Grua”, që doli në publik një muaj më parë, është një mini-album apo “Extended Play” – që në zhargonin e muzikës dhe përkthyer në gjuhën shqipe i bie të jetë një album i shkurtuar.

Mini-albumi, përmban pesë këngë me motive feministe.

Me publikimin e projektit muajin e kaluar, këngëtarja e cilësoi projektin një dedikim për “ato që filluan revolucionin e fundit në Kosovë: gratë dhe vajzat që guxojnë t’i thonë STOP dhunës”.

Për shumëkënd, për karrierën e saj dhe veprimtarinë artistike në vitet 90′ dhe sidomos në fillim vitet 2000′, Adelina Ismaili konsiderohet ‘diva’ e muzikës shqiptare.

Emri i Ismailit është lidhur gjithmonë ngushtë edhe me politikën. Nga përkrahja e verbër për Ibrahim Rugovën dhe LDK-në para dhe paslufte, këngëtarja i doli haptar në mbështetje Lëvizjes Vetëvendosje dhe kryeministrit Albin Kurti në zgjedhjet e shkurtit të vitit 2025.

Në një video-spot përkrahës për Vetëvendosjen pak para zgjedhjeve të 9 shkurtit të këtij viti, Ismaili i ftoi gratë dhe vajzat që të “votojnë me zemër”, një sllogan zgjedhor i Vetëvendosjes së Kurtit tash e disa palë zgjedhje.

“Të dashura nëna, motra, gjyshe, zonja, zonjusha, të gjitha ne të gjithë së bukur në Kosovën tonë të dashur. Ju lutem, dilni dhe votoni! Ardhmëria jonë varet nga vota jonë. Voto me zemër!”, thotë ajo në një video-spot të publikuar gjatë fushatës.

Në mars të vitit të kaluar, Ismaili e intervistoi aktorin Enver Petrovci në një emision televiziv që mbante autorësinë e saj, dhe që ngjalli një debat të madh publik për shkak të komenteve të aktorit për figurat e luftës.

Aktori Petrovci i tha Ismailit se ish-udhëheqësit e shtetit, disa prej të cilëve po mbahen në Hagë qe gati pesë vjet, kishin ardhur rastësisht në shprehje. Petrovci i tha asaj se “lufta i ka bërë këta”.

Pavarësisht prej kritikave të ashpra që mori për komentet kundër liderëve të luftës, Ismaili – njësoj sikurse kryeministri Albin Kurti – i doli në mbrojtje Petrovcit dhe u përpoq të arsyetonte deklarimet e tij për krerët e UÇK-së. /Paparaci.com