Kushtetuesja e Kosovës në prag të vendimit për Kuvendin, çka pritet të ndodhë?

Tri ditë para përfundimit të masës së përkohshme, Gjykata Kushtetuese është ende duke shqyrtuar kërkesat në lidhje me konstituimin e Kuvendit.

Në institucionin më të lartë juridik në vend thonë se para publikimit të aktgjykimit do të trajtojnë të gjitha aspektet kushtetuese të pretendimeve të ngritura në kërkesat e parashtruara, raporton KosovaPress.

Ndërsa Kushtetueses i kërkohet të jetë e qartë dhe precize në aktgjykimin e ri për të shmangur çdo lloj dykuptimësie, njohësit e sistemit juridik japin skenarët mbi vendimmarrjen e mundshme të Kushtetueses për zgjidhjen e ngërçit në Kuvend.

Kosova nuk ka arritur të themelojë institucionet e reja, pavarësisht se zgjedhjet parlamentare janë mbajtur më 9 shkurt.

Kjo masë është vendosur sipas detyrës zyrtare, ani pse nuk ishte kërkuar në kërkesën e parashtruar nga deputetët e PDK-së dhe LDK-së, të cilët kanë kontestuar kushtetutshmërinë e mbajtjes së seancës konstituive pas datës 26 qershor, kur është publikuar aktgjykimi i parë i Kushtetueses.

Gjykata Kushtetuese ka vendosur masë të përkohshme për mbajtjen e seancës konstituive, duke ua ndaluar deputetëve të marrin vendime apo të ndërmarrin veprime nga data 27 korrik deri më 8 gusht, kur do të shpallet aktgjykimi i plotë mbi ngërçin në Kuvend.

Edhe pse Kushtetuesja kishte obliguar deputetët të konstituojnë legjislaturën e nëntë në afat tridhjetëditor, deri më 26 korrik një gjë e tillë nuk kishte ndodhur. Për të adresuar pasojën juridike në këtë rast, Kushtetueses i është drejtuar edhe presidentja, Vjosa Osmani.

Zëdhënësi i Gjykatës Kushtetuese, Veton Dula, në një përgjigje për KosovaPress thotë se për vendimmarrjen e këtij institucioni, me këto kërkesa do të njoftohen me kohë të gjitha palët dhe opinioni publik.

“Kërkesat e fundit përkitazi me konstituimin e Kuvendit të Republikës së Kosovës janë në procedurë të shqyrtimit nga Gjykata. Vendimi do të merret pasi që Gjykata të trajtojë të gjitha aspektet kushtetuese të pretendimeve të ngritura në kërkesat e parashtruara. Për vendimmarrjen e Gjykatës do të njoftohen me kohë të gjitha palët e interesit dhe opinioni”, thuhet në përgjigjen e tij.