E rëndë: Rrëzohet teksa ecte në rrugë, vdes 76-vjeçari
Një ngjarje tragjike është shënuar sot në qytetin e Klinës, ku një burrë rreth moshës 76-vjeçare ka humbur jetën në rrethana të dyshimta.
Burime të Sinjalit brenda hetuesisë bëjnë me dije se viktima Krist Marki, rreth 76-vjeçar, ishte rrëzuar papritur teksa po ecte në rrugën “Sadik Rama”. Ngjarja ka ndodhur rreth orës 13:40, ndërsa një i mitur, që ndodhej aty afër, ka lajmëruar menjëherë autoritetet.
Në vendngjarje kanë dalë njësitë policore dhe hetuesit, ndërkohë që viktima është transportuar urgjentisht për në Spitalin Rajonal të Pejës nga ekipi emergjent, por mjekët kanë konstatuar se ai nuk kishte shenja jete.
Me urdhër të Prokurorit kujdestar, rasti është cilësuar si “Hetim i vdekjes”, ndërsa trupi i pajetë është dërguar në Institutin e Mjekësisë Ligjore për obduksion.
Rrethanat e rastit mbeten ende të paqarta dhe hetimet janë në vazhdim.
